იმერეთის ფოლკლორის საერთაშორისო ფესტივალის – „მოგზაურობა დროში“

სულისჩამდგმელსა და ორგანიზატორს, საქართველოს ფოლკლორისა და ტურიზმის განვითარების ცენტრ „ნატალის“ დამფუძნებელსა და დირექტორს, საქართველოს ქორეოგრაფთა ბრწყინვალების ორდენის კავალერს, არტ-ფოლკის ალამდარის ორდენოსანს, ქალბატონ ნაილი კიბაბიძეს

ქალბატონო ნაილი,

უდიდესი პატივისცემითა და მოკრძალებით, ა(ა)იპ კულტურის ინსტიტუტის „ქართული ხალხური ცეკვის ქორეოგრაფ-რეპეტიტორის პროფესიული გადამზადების პროგრამის“ მსმენელთა ანსამბლი „არტ-საქართველო“ მადლიერების უპირველეს სალამს გიძღვნით თქვენ.

თქვენი შემოქმედება და ღვაწლი ქართული კულტურის წინაშე ჭეშმარიტად გამორჩეულია. დღეს მთელი საქართველო ამაყობს თქვენი ხელოვნებით – თითქმის ყველა ქორეოგრაფიული ანსამბლის საკონცერტო სამოსი ხომ სწორედ თქვენი უბადლო ნიჭით, ფანტაზიითა და ხელით არის შექმნილი. თქვენ მიერ ნაკერი თითოეული სამოსი ყოველ ქართულ ცეკვას განსაკუთრებულ სულს შთაბერავს და სცენაზე აცოცხლებს!

ჩვენთვის განსაკუთრებით ამაღელვებელი და ფასდაუდებელია თქვენი სრულიად უანგარო თანადგომა, რომელსაც ანსამბლი „არტ-საქართველო“ ყოველ ნაბიჯზე გრძნობს. ეს არ არის უბრალოდ პროფესიონალიზმი – ეს ხელოვნებისადმი თავდადებული მსახურებისა და უმაღლესი პატრიოტიზმის უნიკალური ფენომენია.

უღრმეს მადლობას გიხდით იმერეთის დალოცვილ მიწაზე საერთაშორისო ფესტივალის უმაღლეს დონეზე ორგანიზებისთვის, ჭეშმარიტად ქართული, თბილი მასპინძლობისთვის და იმ შემოქმედებითი მუხტისთვის, რომელიც ჩვენს ხელოვანებს გადაეცით. თქვენი სახელი ღირსეულად იწერება ქართული ფოლკლორის ისტორიაში.

ანსამბლი „არტ-საქართველო“ და კულტურის ინსტიტუტი ქედს იხრის თქვენი გამორჩეული ამაგისა და დიდი ქართული სულის წინაშე! გისურვებთ ულევ ენერგიას, მტკიცე ჯანმრთელობასა და მრავალ შემოქმედებით ტრიუმფს!

ღრმა პატივისცემითა და მადლიერებით,
მურმან გამისონია
კულტურის ინსტიტუტის დირექტორი,
ანსამბლ „არტ-საქართველოს“ დამფუძნებელი